ਬੀਜਿੰਗ : ਜਾਪਾਨ, ਆਸਟ੍ਰੇਲੀਆ ਤੇ ਫਰਾਂਸ ਦੇ ਫੌਜੀ ਅਭਿਆਸ 'ਚ ਅਮਰੀਕਾ ਦੇ ਵੀ ਸ਼ਾਮਲ ਹੋਣ 'ਤੇ ਚੀਨ ਨੇ ਅਮਰੀਕਾ ਨਾਲ ਨਾਰਾਜ਼ਗੀ ਜ਼ਾਹਰ ਕਰਦਿਆਂ ਸਰਕਾਰੀ ਅਖ਼ਬਾਰ ਗਲੋਬਲ ਟਾਈਮਜ਼ ਦੇ ਆਪਣੇ ਸੰਪਾਦਕੀ 'ਚ ਚੀਨ ਨੂੰ ਸੁਪਰਪਾਵਰ ਦੱਸਦਿਆਂ ਅਮਰੀਕਾ ਨੂੰ ਚਿਤਾਵਨੀ ਦਿੱਤੀ ਹੈ ਕਿ ਜੇ ਯੁੱਧ ਛਿੜਿਆ ਤਾਂ ਉਸ 'ਚ ਅਮਰੀਕਾ ਦੀ ਹਾਰ ਹੋਵੇਗੀ। ਇਸ ਅਖ਼ਬਾਰ ਨੂੰ ਚੀਨ ਦੀ ਸੱਤਾ ਧਿਰ ਕਮਿਊਨਿਸਟ ਪਾਰਟੀ ਦਾ ਮੁੱਖ ਪੱਤਰ ਮੰਨਿਆ ਜਾਂਦਾ ਹੈ। ਇਸ 'ਚ ਪ੍ਰਕਾਸ਼ਿਤ ਗੱਲ ਸਰਕਾਰ ਦਾ ਬਿਆਨ ਮੰਨਿਆ ਜਾਂਦਾ ਹੈ।
ਇਸ ਤੋਂ ਪਹਿਲਾਂ ਵੀਰਵਾਰ ਨੂੰ ਚੀਨ ਨੇ ਕਿਹਾ ਸੀ ਕਿ ਦੱਖਣੀ ਜਾਪਾਨ 'ਚ ਹੋ ਰਹੇ ਇਸ ਫ਼ੌਜੀ ਅਭਿਆਸ ਨਾਲ ਉਸ ਦੀ ਸਿਹਤ 'ਤੇ ਕੋਈ ਫ਼ਰਕ ਨਹੀਂ ਪੈਂਦਾ। ਇਹ ਫ਼ੌਜੀ ਅਭਿਆਸ ਸਿਰਫ਼ ਤੇਲ ਈਂਧਨ ਦੀ ਬਰਬਾਦੀ ਹੈ। ਚੀਨ ਪੂਰੇ ਦੱਖਣੀ ਚੀਨ ਸਾਗਰ ਨੂੰ ਆਪਣੀ ਜਾਇਦਾਦ ਦੱਸਦਾ ਹੈ। ਉਹ ਇਸ 'ਤੇ ਬ੍ਰੂਨੇਈ, ਮਲੇਸ਼ੀਆ, ਫਿਲੀਪੀਂਸ, ਵਿਯਤਨਾਮ ਤੇ ਤਾਈਵਾਨ ਦੇ ਦਾਅਵੇ ਨੂੰ ਨਕਰਾਉਂਦਾ ਹੈ। ਇੰਨਾ ਹੀ ਨਹੀਂ, ਤਾਈਵਾਨ ਦੀ ਪ੍ਰਭੂਸੱਤਾ ਨੂੰ ਨਕਰਾਉਂਦਿਆਂ ਉਸ ਨੂੰ ਆਪਣਾ ਹਿੱਸਾ ਦੱਸਦਾ ਹੈ। ਜਾਪਾਨ ਦੇ ਹਿੱਸੇ ਦੇ ਸਮੁੰਦਰ ਨੂੰ ਵੀ ਪੂਰਵੀ ਚੀਨ ਸਾਗਰ ਦੱਸਦਿਆਂ ਚੀਨ ਉਸ 'ਤੇ ਆਪਣਾ ਅਧਿਕਾਰ ਜਤਾਉਂਦਾ ਹੈ ਤੇ ਉੱਥੇ ਆਪਣੇ ਜੰਗੀ ਜਹਾਜ਼ ਭੇਜਦਾ ਰਹਿੰਦਾ ਹੈ, ਲੜਾਕੂ ਜਹਾਜ਼ ਅਕਾਸ਼ 'ਚ ਉਡਾਉਂਦਾ ਰਹਿੰਦਾ ਹੈ। ਬ੍ਰਿਟਿਸ਼ ਨਿਊਜ਼ ਵੈੱਬਸਾਈਟ ਐਕਸਪ੍ਰੈੱਸਡਾਟਸੀਓਡਾਟਯੂਕੇ ਮੁਤਾਬਿਕ ਇਸ ਹਫ਼ਤੇ ਦੀ ਸ਼ੁਰੂਆਤ 'ਚ ਚੀਨ ਦੀ ਪੀਪੁਲਸ ਲਿਬਰੇਸ਼ਨ ਆਰਮੀ ਨੇ ਆਪਣੇ ਮਰੀਨ ਕਮਾਂਡੋ ਦੀ ਟਰੇਨਿੰਗ ਦੀ ਇਕ ਵੀਡੀਓ ਜਨਤਕ ਕੀਤੀ ਹੈ। ਇਸ 'ਚ ਉਹ ਇਕ ਦਵੀਪ 'ਤੇ ਹਮਲਾ ਕਰਦਿਆਂ ਦਿਖਾਈ ਦੇ ਰਹੇ ਹਨ। ਮੰਨਿਆ ਜਾ ਰਿਹਾ ਹੈ ਕਿ ਇਸ ਰਾਹੀਂ ਚੀਨ ਤਾਈਵਾਨ ਨੂੰ ਧਮਕਾਉਣ ਦੀ ਕੋਸ਼ਿਸ਼ ਕਰ ਰਿਹਾ ਹੈ। ਨਾਲ ਹੀ ਉਹ ਆਪਣੀ ਫ਼ੌਜ ਤਿਆਰੀ ਵਧਾਉਣ ਦਾ ਸੰਦੇਸ਼ ਵੀ ਦੇ ਰਿਹਾ ਹੈ।